Ad te levávi óculos meos, * qui hábitas in cælis.
Ecce sicut óculi servórum ad manus dominórum suórum, * sicut óculi ancíllæ ad manus dóminæ suæ,
ita óculi nostri ad Dóminum Deum nostrum, * donec misereátur nostri.
Miserére nostri, Dómine, miserére nostri, * quia multum repléti sumus despectióne;
quia multum repléta est ánima nostra * derisióne abundántium et despectione superborum.
Glória Patri, et Fílio, * et Spirítui Sancto.
Sicut erat in princípio, et nunc et semper, * et in sǽcula sæculórum. Amen.
Nisi quia Dóminus erat in nobis, * dicat nunc Israël,
nisi quia Dóminus erat in nobis, * cum exsúrgerent hómines in nos:
forte vivos deglutíssent nos, * cum irascerétur furor eórum in nos.
Fórsitan aqua absorbuísset nos, * torrens pertransísset ánimam nostram;
fórsitan pertransíssent ánimam nostram * aquæ intumescéntes.
Benedíctus Dóminus, * qui non dedit nos in direptiónem déntibus eórum.
Anima nostra sicut passer erépta est * de láqueo venántium:
láqueus contrítus est, * et nos erépti sumus.
Adjutórium nostrum in nómine Dómini, * qui fecit cælum et terram.
Glória Patri, et Fílio, * et Spirítui Sancto.
Sicut erat in princípio, et nunc et semper, * et in sǽcula sæculórum. Amen.
Qui confídunt in Dómino, sicut mons Sion: * non commovébitur, in ætérnum manet.
Jerúsalem, montes in circuítu eius, † et Dóminus in circuítu pópuli sui * ex hoc nunc et usque in sǽculum.
Quia non requiéscet virga iniquitátis super sortem justórum, * ut non exténdant justi ad iniquitátem manus suas.
Bénefac, Dómine, bonis * et rectis corde.
Declinántes autem per vias pravas † addúcet Dóminus cum operántibus iniquitátem. * Pax super Israël!
Glória Patri, et Fílio, *et Spirítui Sancto.
Sicut erat in princípio, et nunc et semper, *et in sǽcula sæculórum. Amen.
Keine Kommentare:
Kommentar veröffentlichen